Prtunangan "Ey" [ Adek den ] 4.12.2011

       Slamat brtunang kek adik bongsu pompuan den ni haa.Borsori2 ghupo eh bilo dimekap.Sbolum ni muko eh tak ponah jumpo lipstik,shadow dan ntah apo namo eh alat mekap..sosokali cantik gak ghupo eh.Cinto pandang prtamo eh mreko ditomukan smaso sesamo menjua potai.mako ni den gola cinto potai laa.Adik den ni memang jarang sangat klua umah.Dok kat umah memasak dan kojo eh buat kojo kraftangan.Den doakan bia jodoh eh dongan pilihan ongang tuo ni  koka slamo eh.Mogo sgalo urusan bojalan sosempurno mungkin.Ongang kato dangah ongang brtunang ni manih...

      Ni haa sbahagian barang antaran eh.Pihak lolaki ngantar tujuh dulang dongan iringan 12 buah keto..umang aii..ghamainyo..Bagi pihak pompuan baleh semilan laa plak.Topak singih tak lupo dongan  sirih junjung.Adek psako mlayu..ongang kato adek mosti ikut brsondikan agamo.

    Acaro prtunangan ni dibuek ngikut caro lamo macam dolu2.Tunang eh tak ngikut..yang datang cumo pakcik,makcik paklong maklong eh dongan ahli kluargo yang ghapat.Adik den pun tak kluar bilik untuk dikonakan kat tetamu.Kok ado yang nak nengok leh masuk bilik la.Plamin pun tak do buek..bukan nak kawin ..sok dah ijan kabul plamin sanding bebona la.

        Den nak citor pngalaman prtamo den ni haa sbagai penyambut rombongan pominangan pihak lolaki.Ni kiro blaja la.Den kan ghamai anak pompuan...sok nak nrimo laa..

Mulo eh ktuo rmbongan ngulurkan topak singih.Den bukak dan tngok ghupo isi eh.Longkap sirih,kapur,gambir eh.Tu makno eh hajat rombongan bosa dan klau den dah bukak kono laa ngadap.Dikobain mreko dtang bawak ajat yg brmakno.Ringkas eh den dh tau ajat tu.Tngok plak tando ghupo eh wakil sbontuk cincin.Dah belek dan diakui sah omeh tulin mako acaro peminangan ni brsotuju.Mako upacaro mnyarong cincin brmulo.Apo yang ditanyo...,Sonang ghunding apo ditanyo den jawab yo dgn sendi kato2 berlapik kiasan.Apo yg den adik bradik dah pakat dan omak abah stuju mako kputusan eh hantaran sbanyak RM6 ghibu mengikut kososuaian hrgo smaso dan tak bobankan pihak lolaki.Tempoh eh dalam lingkungan stahun.Kok copek lobih baek.  

Okey laa..shinggo kito brjumpo laei dilain maso dan kotiko.Ingat posan den.Adek mosti dijunjung Agamo mosti dikelek.Ikut adek brsondikan agamo menikut tradisi ongang kito ongang mlayu.Tak kan Mlayu hilang didunio...